2022 сыл Саха Өрөспүүбүлүкэтигэр Ийэ сылынан, Сунтаар улууһугар Дьиэ кэргэн сылынан биллэриллибиттэрэ. Сыл устата бу чэрчитинэн элбэх үлэ ыытылынна. Ол иһигэр ГТАС уорганнара өрөспүүбүлукэ үрдүнэн эмиэ элбэх тэрээһин ыыттылар: саҥа төрөөбүт оҕолору, ыал буолааччылары сокуоннай сурукка киллэрии, 50 сылтан үөһээ бииргэ ыал буолан олорор убаастанар ыаллары чиэстээһин. 
Сунтаар улууһугар Кыһыл көмүс кинигэ 29 сыл анараа өттүгэр, оччолорго ГТАС отделын салайааччыта Зинаида Валентиновна Иванова көҕулээһининэн олохтоммута. Бастакы кинигэ саҕаланарыгар саха дьонун саамай сүрүн тэрээһинигэр – ыһыахха, бэс ыйын 24 күнүгэр  улуус нэһилиэктэриттэн 27 ыал бу кинигэҕэ бастакынан киирбиттэрэ. 
2022 сылы түмүктүүр курдук ахсынньы ыйын 31 кунугэр Уһун-Күөл нэһилиэгэр икки ытык ыалы бэлиэтээтилэр. Владимир Семенович уонна Галина Васильевна Аввакумовтар, Николай Алексеевич уонна Евдокия Дмитриевна Егоровтар дьиэ кэргэннэрэ эдэр көлүөнэҕэ холобур буолар ыаллар. Кинилэр үлэни таҥара оҥостон, нэһилиэк да, улуус да социальнай-экономическай сайдыытыгар элбэх кылааттарын киллэрбит туруу үлэһит дьон. Сыралаах үлэттэн ордон оҕолорун бука барыларын атахтарыгар туруортаан, үөрэхтээн, билигин элбэх сиэн, хос сиэн тапталлаах эһээлэрэ, эбээлэрэ буолан бочуоттаах сынньалаҥҥа олороллор, оҕолоругар, сиэннэригэр үтүө сүбэһит, күүс-көмө буолаллар. 
Ити курдук, ааспыт сылга барыта 17 ыал чиэстэннэ, уопсайа бу кинигэҕэ 319 Сунтаар улууһун ытык-мааны ыаллара сурулуннулар. Олох судургу быраабылатынан, күннээҕи түбүгүнэн, киһилии сыһыанынан салайтаран олорор дьоһун – мааны дьоммутугар үүммүт сылга доруобуйаны, дьолу, үөрүүнү баҕарабыт!

Анна Григорьева, 
Сунтаар улууһун ГТАС отделын салайааччыта