Нам улууһугар ааспыт 2022 сылга 301 оҕо төрөөбүтүн туһунан гражданскай акт туруга толоруллубут. Мантан 116 оҕоҕо сахалыы ааттар иҥэриллибиттэр. “Кыыһа”, “Уола” диэн дьаралыктаах толору аат 7 оҕоҕо бэриллибит. Мантан биэһэ – уол, иккитэ – кыыс. 
Сахалыы ааттарга Күндүмэн, Быйаман, Талбан, Таман, Харысхан, Алгыс, Кыталыына, Намия-Куо, Чэлгийээнэ, Уйгууна, Кэрэчээнэ, Кэрэли, Далаана, Кыталыына, Самаана, Эрэл, Айаар, Тургун, Сааскыйа диэннэри хото биэртэлиир буолбуттар. Оттон урут-уруккуттан олохсуйбут Ньургун, Ньургуйаана, Туйаара, Мичил уо.д.а.ааттар бэриллибэт буолбуттар.Ол эрээри, кэнники сыллары кытта тэҥнээтэххэ, оҕолорго сахалыы ааттары биэрии элбээбитэ бэлиэтэммит. 
Нууччалыы, омуктуу ааттарга Каталея, Миранда, Анна-Мария, Амира, Ариела, Арилена, Данияр, Алмаз, Лео, Варлам диэн сонун ааттар бэриллибиттэр. Ванялар, Машалар, Танялар ончу да муодаттан тахсыбыттар, ким да бу ааттары оҕолоругар биэрбэтэх.
Тустаах информацияны ЗАГС управлениетын Нам улууһугар отделын салайааччыта Марина Кокарева бэлэмнээтэ