Бэҕэһээ, олунньу 13 күнүгэр, улуус дьаһалтатын аактабай саалатыгар СР Правительствотын иһинэн гражданскай турук аактатын толорор управление салайааччыта Тамара Кривошапкина уонна СР Правительствотын иһинэн гражданскай турук аактатын толорор управление Дьокуускай куораттааҕы отделын салайааччы Римма Алексеева Намҥа тахсан баһылык Юрий Слепцову кытта көрүстүлэр.

Нэһилиэк баһылыктарын планеркатыгар Тамара Николаевна республикаҕа 2022 сыл түмүктэрин, инники тураар соруктары билиһиннэрэн кэпсээтэ. Төһө да уустук сыллар аасталлар, Юрий Иннокентьевич сатабыллаах салайыытынан саҥа сокуоҥҥа уларыйыы уонна эбиллии киирэрин саҕана Нам улууһа үлэтин тохтоппокко, бастыҥнар кэккэлэригэр сылдьыбытын тоһоҕолоон эттэ уонна махтанарын биллэрдэ.

Юрий Иннокентьевич Хатыҥ Арыы баһылыгынан олорон олохтоох дьаһалта ГТАС үлэтин толорууга эмиэ бастыҥнар ааттарыгар сылдьыбыт. Ол таһымын ыһыктыбакка, улууска да кэллэр үлэни күргүөмнээхтик ыыппытын иһин, республикаҕа улуус баһылыктарыттан биир бастакынан «За вклад в развитие органов ЗАГС Республики Саха (Якутия)" диэн түөскэ иилиллэр бэлиэнэн наҕараадалаата.

Ону сэргэ, Марина Кокарева салайааччылаах гражданскай турук аактатын толорор управление Намнааҕы салаатыгар болҕомто ууран, Нам килбэйэр киинигэр саҥа дыбарыаска олохтообуттарыгар үөрэ-көтө махтаннылар.

«Нам улууһа» МТ пресс-сулууспата