Олунньу 14 күнүгэр, саҥа дыбарыаска киирбит гражданскай турук аактатын толорор управление Намнааҕы отделын мааны саалатыгар 50 уонна 55 сыл бииргэ олорбут ытык-мааны ыаллары эҕэрдэлээтилэр.

Ленскэй нэһилиэктэн Екатерина Ильинична уонна Дмитрий Михайлович Елисеевтэр, Вера Михайловна уонна Денис Степанович Фёдоровтар, 1-Хомустаах нэһилиэгиттэн Светлана Ионовна уонна Анатолий Гаврильевич Аргуновтар, Партизантан Ольга Иннокентьевна уонна Петр Петрович Кривошапкиннар 50 сыл уонна Бастакы Хомустаахтан Варвара Касьяновна уонна Федор Иванович Новгородовтар 55 сыл алаһа дьиэ тэринэн, оҕо-уруу тэнитэн бииргэ олорбуттарын үөрүүлээхтик чиэстээтилэр. Дьоллоох дьиэ кэргэттэри улуус баһылыга Юрий Слепцов истиҥник эҕэрдэлээтэ, кинилэр үүнэр ыччакка үтүө холобур буолалларын, бары улуустарын туһугар үлэни өрө тутан кэлбиттэригэр махтанан туран, эҕэрдэ суруктары уонна сертификаттары бэлэх уунна. Намнааҕы гражданскай турук аакталарын толорор отдел салайааччыта Марина Кокарева бэйэтин эҕэрдэтин тиэрдэн туран, СР Ил Дархана Айсен Николаев эҕэрдэ суругун үөрүүлээх быһыыга-майгыга туттарда. Салгыы чиэстэнэр ыалларбыт оҕолоро, аймахтара, нэһилиэктэр баһылыктара бэйэлэрин эҕэрдэлэрин тиэртилэр, сэмэй бэлэхтэрин туттардылар.

Ону тэҥэ СР дьиэ кэргэн уонна демография политикатыгар кылааттарын, ийэ уонна аҕа оруолларын үрдэтиигэ көмө буолалларын, чөл олоҕу тарҕаталларын уонна көхтөөх общественнай үлэлэрин иһин «Дьиэ кэргэн политикатын сайдыытыгар кылааттарын иһин» бэлиэнэн көрүүтэ-истиитэ суох оҕолору иитэ ылбыт дьиэ кэргэттэр – Партизан нэһилиэгиттэн Ульяна Иннокентьевна, Егор Егорович Зыряновтар уонна Иккис Хомустаахтан Мотрена Гаврильевна, Айкар Николаевич Филипповтар наҕараадаланнылар.

Күн иккис аҥарыгар Намнааҕы ЗАГС отделын саалатыгар эдэр оҕолор Сахайана Сивцева уонна Аян Меркулов олохпут устатын тухары бииргэ буолуохпут диэн биир санааҕа кэлэн кыһыл көмүс көлөөскөлөрүн кэттилэр, кэргэннии буолбут туоһу суруктарын туттулар.

Бүгүҥҥү үөрүүлээх күҥҥэ киэн туттар ытык-мааны дьиэ кэргэттэрбитигэр уонна саҥа үөскээбит ыалбытыгар истиҥ эҕэрдэбитин тиэрдэбит. Тапталгыт хаһан да уҕараабатын, чэгиэн доруобуйаны, дьолу-соргуну баҕарабыт.

«Нам улууһа» МТ пресс-сулууспата