Муус устар 15 күнугэр Эдьигээн оройуонун Кыстатыам нэһилиэгэр өтөрүнэн буолбатах ураты күн буолан ааста.
Ол курдук, нэһилиэккэ убаастанар дьоммут Мария Николаевна, Алексей Семенович Сергеевтар аал уоту оттунан, алаһа дьиэни тэринэн, оҕо-уруу төрөтөн, үйэ аҥаара бииргэ олорбуттарын бэлиэтиир кыһыл көмүс сыбаайбаларыгар туоһу буолаары олохтоохтор, ону тэҥэ Дьокуускайтан, Намтан, Эдьигээнтэн муһуннулар.
50 сыл бииргэ олоруу мээнэ буолбатах, манна киһи олорорун тухары араас ыарахаттары  да, дьоллоох түгэннэри да көрсөр. Бэйэ бэйэҕэ эрэллээх буолуу, убаастаһыы баар буолла5ына, барыга бары бииргэ сырыттахха, кытаанах дьиэ кэргэн укулаата оҥоһуллар.
Онон 50 сыл бииргэ олорбут дьоммут эдэр көлүөнэҕэ холобур эрэ буолаллар.
50 сыл устата бииргэ олорбут дьоммутун сиэр-туом быһыытынан ыытааччы киирии тылынан, кинилэри үҥкүүнэн арыаллаан, Мендольсон маршынан, дохсун ытыс тыаһынан саалаҕа көрүстүбүт.
Кыһыл көмүс биһилэхтэри хардарыта кэттилэр, үбүлүөйнэй кинигэҕэ илии баттаатылар, аал уоту оттон унаарыттылар...
Саха Республикатын Правительствотын иһинэн ГТАС Управленията олохтообут "Дьиэ-кэргэн килбиэнэ" анал бэлиэтэ уонна Ил Дархан А.С. Николаев эҕэрдэ суруга туттарылынна.
Салгыы оройуон аҕа баһылыга Василий Николаевич Сорокин тыл эттэ, бэлэх туттарда, уонна Кыстатыам нэһилиэгин аҕа баһылыга Сергей Иванович Корякин махтал суругу кытта 50 сыл үбүлүөйдээх дьоммутугар 50 тыһ. суумалаах харчыннан бириэмийэни туттарда.