Ольга уонна Андрей Андреевтар сүрэхтэринэн сөбүлэһэн 1998 сыл муус устар 9 күнүгэр ыал буолбуттара. Быйыл кинилэр истиҥ, сылаас сыһыаннаахтык бииргэ олорбуттара 25 сылын бэлиэтээтилэр. Ольга Алексеевна Үөһээ Бүлүүтээҕи киин балыыһа акушерскай отделениетын медицинскэй сиэстирэтэ, Саха Өрөспүүбүлүкэтин доруобуйа харыстабылын туйгуна, 35 сылын эҥкилэ суох үлэлиир дьон махталын ылар үтүө үлэһит. Андрей Артемович олох-дьаһах коммунальнай хаһаайыстыба төһүү үлэһитэ, бэтэрээнэ. Андреевтар Үөһээ Бүлүү улууһун Үөдүгэй нэһилиэгэр 2010 сыллаахха саҥа дьиэ туттан киирэн, хаһаайыстыба тэринэн, оҕуруот олордон нэһилиэк бөҕөх туруктаах ыаллара. Ольгалаах Андрей тапталларын туоһутунан 4 оҕону төрөтөн-иитэн, олох киэҥ аартыгар үктэннэрдилэр. Ол курдук, улахан кыыс Туяра үрдүк үөрэхтээх врач-стоматолог, олоҕун аргыһынаан Дормидоннуун 3 оҕолоохтор, билигин Казахстаҥҥа Алма-Атаҕа дьиэ кэргэнинээн олороллор. Айыына үрдүк үөрэҕи бүтэрэн инженер-геолог идэтин баһылаата. Иккис кыыс Зина уонна ыал соҕотох уоллара, 4 оҕоттон кыралара Олегтыын ХИФУ студеннара. Андреевтар общественнай олоххо, тэрээһиннэргэ көхтөөхтүк кыттар дьиэ кэргэн. Оҕолоро кыра эрдэхтэриттэн спордунан утумнаахтык уонна күүскэ дьарыктаналлар, кинилэр остуол оонньуутугар улуус уонна республика чемпионнара, «Манчаары» оонньууларын абсолютнай чемпионнара. Айыына - спорт национальнай көрүҥүн маастара, Олег - спорт национальнай көрүҥүн маастара, шашкаҕа маастарга кандидат. Андреевтар дьиэ кэргэн девизтара: «Биһиги дьиэ кэргэммит - биһиги киэн туттуубут»