Аат уларытар санааҕа араас төрүөтүнэн  хас биирдии киһи бэйэтин суолунан кэлэр. Үчүгэйдик толкуйданан, ыйааһыннаан баран уларыттарар ордук. Тоҕо диэтэххэ аат уларыйыытын кытта элбэх докумуон, юридическай сыһыаннаһыы сибээстээх, ону барытын кэмигэр уларыттарар ирдэнэр. Онон аат уларытар дьон маннык түгэннэри учуоттуохтарын наада диэн сүбэлээри гынабын:

• Биһиги бука бары Россияҕа олоробут. Дойдубутугар 190 тан тахса ураты тыллаах-өстөөх, культуралаах омуктар олороллор. Бу элбэх норуот бэйэ-бэйэбитин кытта өйдөһөрбүт наадатыгар Конституцияҕа олоҕуран уопсай нууччалыы тылынан туттабыт. Билиҥҥитэ национальнай өрөспүүбүлүкэлэргэ ГТАС уорганнарын туоһу суруктарыгар икки тылынан толоруу барар. Ол курдук туоһу сурук нууччалыы өттүгэр нууччалыы буукубаларынан толоруу барар (холобур «кыыһа» диэҥҥэ «с», эбэтэр «ь», эбэтэр атын нууччалыы буукуба гражданин бэйэтин баҕатынан суруллар), онтон сахалыы өттүгэр сахалыы буукубаларынан суруллар. Атын тэрилтэҕэ сахалыы толоруу диэн суох;
• 18 сааһын туола илик оҕолоох төрөппүттэр ааттарын уларыталлара уратылаах. Ол курдук сокуоннай сааһын ситэ илик оҕо бырааба күөмчүлэммэтин туһугар кини төрөппүттэрин ааттара уларыйар түгэнигэр оҕо докумуонугар эмиэ уларыйыы киирэн иһиэхтээх. Бу ордук арахсыбыт төрөппүттэргэ уустук соҕус боппуруос. Онон оҕо төрөппүттэрэ биир санааҕа кэлэллэрэ ордук;
• 14 сааһыттан 18 сааһыгар дылы оҕо бэйэтин аатын уларытар буоллаҕына төрөппүттэртэн (арахсыбыт да буоллахтарына) иккиэннэриттэн сөбүлэҥ ирдэнэр (ЗАГСка кэлбэт түгэннэригэр нотариуһынан бигэргэммит буолуохтаах);
• 2012 сыл ыам ыйын 22 күнүттэн «Саҥа төрөөбүт оҕоҕо сахалыы үгэһинэн араспаанньа уонна аҕа аатын иҥэрии» диэн сокуон олоххо киирбитэ. Бу сокуоҥҥа олоҕуран элбэх оҕоҕо аҕатын аатыгар эбии «уола, кыыһа» диэн сурулунна. Ол эрээри бу сокуон олоххо киириэн иннинэ, эбэтэр кэлин нууччалыы быраабыланан суруллубут аҕа ааттаах оҕолорго үлэлээбэт, ол аата «уола, кыыһа» диэн эбии сатаан суруллубат. Бу оҕолор кэлин, 14 саастарын туоллахтарына бэйэлэрин баҕаларынан уларыттарыахтарын сөп.

Анна Васильевна Григорьева,
Саха Өрөспүүбүлүкэтин Бырабыыталыстыбатын иһинэн
Гражданнар туруктарын аактатын суруйар Управление
Сунтаар улууһунааҕы (оройуонунааҕы)
салаатын салайааччыта