Бэс ыйын 19 күнүгэр Таатта улууһун Игидэй нэһилиэгэр «Ийэҕэ-махтал» диэн ааттаах Дьоруой Ийэлэргэ аналлаах сүдү тутуу, сквер үөрүүлээх быһыыга-майгыга аһыллыыта буолла.

Сквер тутуутун Анастасия Николаевна, Владимир Алексеевич Лопатиннар төрөппүт оҕолоро, сиэннэрэ, хос сиэннэрэ күргүөмүнэн илиилэрин араарбакка оҥордулар, туттулар. Лопатиннар уон биир оҕолоох улууспут киэн туттар дьиэ кэргэнэ 2008 сыллаахха, Саха Өрөспүүбүлүкэтин ГТАС Управлениета таһаарбыт «Кыһыл көмүс кэргэнниилэр» кинигэ бастакы чааһын геройдарынан буолаллар. Кинилэр оҕолоро, сиэннэрэ, хос сиэннэрэ өрөспүүбүлүкэбит сайдарын, тупсарын туһугар араас хайысхаларга үлэлии-хамныы, айа-тута сылдьаллар.

Сүрүн көҕүлээччилэринэн Дьоруой Ийэ Анастасия Николаевна улахан кыыһа Анна Владимировна Лопатина, Ванда Владимировна уонна Виталий Михайлович бар дьонун түмэ тардан эппит этиилэрин тиһэҕэр тиэрдэн нэһилиэк олохтоохторугар, дьиэ кэргэттэригэр, ыччакка биир суолталаах тутууну бэлэх ууммуттара олус кэрэхсэбиллээх. Бу күн элбэх үтүө, махтал тыллар этиллиннилэр, алгыс тыл бастыҥа ананна. Анастасия Николаевна уонна Владимир Алексеевич кэнчээрилэрин үтүө холобурдара нэһилиэк, улууспут, өрөспүүбүлүкэбит дьонун өрүү сырдыкка, кэрэҕэ сирдии турдун.