Таатта улууһугар от ыйын 7 күнүгэр Дьиэ кэргэн,таптал уонна бэриниилээх буолуу күнүн көрсө 65 сыл бииргэ олорбут Тихонова Лидия Ивановнаны уонна Мартынов Пантелеймон Карповиһы, 55 сыл бииргэ олорбут Татьяна Дмитриевна уонна Егор Степанович Неустроевтары чиэстээһин буолла. Күндү юбилярдарбытын бу күн Таатта улууһун кэргэнниилэрин Бочуот кинигэтигэр киллэрдибит, Ил Дархан Айсен Сергеевич Николаев эҕэрдэ суруга туттарыллынна. Бу күн Татьяна Дмитриевнаҕа уонна Егор Степановичка «Дьиэ кэргэн, таптал уонна бэриниилээх буолуу» бэлиэлэрэ дохсун ытыс тыаһынан туттарыллынна.Күндү юбилярдарбытыгар алгыс бастыҥа ананна, элбэх  эҕэрдэ тыл этилиннэ. Киэн туттар ытык ыалларбытыгар чэгиэн доруобуйаны, оҕолорун, сиэннэрин, хос сиэннэрин тапталларыгар бигэнэ, өссө да уһуннук олороллоругар баҕарабыт. Маны таһынан бу бэлиэ күнү көрсө Таатта нэһилиэгин эдэр ыала Сайыына уонна Иван Алексеевтарга икки игирэ кыргыттар Самааналаах, Сайаана төрөөбүттэрин туоһулуур суруктар туттарыллыннылар. Кэрэчээн кыргыттарбыт дьоннорун үөрдэ, доруобай-чэгиэн улааталларыгар баҕарабыт.