Балаҕан ыйын 23 күнүгэр Сунтаар улууһун Аллыҥатыгар аал уоту оттунан, алаһа дьиэни тэринэн, оҕо-уруу төрөтөн, бииргэ ыал буолан олорбуттара 50 сыллаах үбүлүөйдээх күннэрин Александра Егоровна, Гаврил Егорович Васильевтар бэлиэтээтилэр. Кинилэр өр сылларга төрөөбүт-үөскээбит нэһилиэктэрин олоҕун уйгута сайдарыгар үлүскэн үлэни үлэлээн кэлбит, сэттэ оҕону  улаатыннаран атахтарыгар туруорбут ытыктанар ыалбыт буолаллар. Ол курдук Александра Егоровна  атыы-эргиэн эйгэтигэр, Гаврил Егорович нэһилиэк олох-дьаһах салайааччытынан үлэлээн бочуоттаах сынньалаҥҥа тахсыбыттара. Ыал аҕа баһылыга нэһилиэккэ аҕа түмсүүтүн салайсан эдэр ыччаты булт сиэригэр-туомугар сыһыаран үлэни тэрийэр ытыктанар киһи.  Васильевтар оҕолоро ийэлэрин Александра Егоровнаны утумнаан спорт араас көрүҥэр ситиһиилэрэ үгүс. Билигин бары үөрэхтээх, үлэһит дьон буолан үөрэҕирии, олохтоох бэйэни салайыныы, атыы-эргиэн эйгэлэригэр ситиһиилээхтик үлэлии-хамныы сылдьаллар. 
 Бу күн күндү ыалбыт Ил Дархан махтал суругун, улуус, нэһилиэк дьаһалталарын эҕэрдэлэрин, сэмэй бэлэхтэрин туттулар, улуус кыһыл көмүс бочуоттаах кинигэтигэр  илии баттаан киирдилэр.

Анастасия Никифорова, Аллыҥа нэһилиэгин дьаһалтатын ГТАС специалиһа