Нам улууһун загс отделын кыраһыабай саалыгар ахсынньы аам даам тымныытыгар сүрэҕи сылаанньытар дьоро түгэн буолан ааста. Бэйэ бэйэлэрин таптаһан, өйөһөн өйдөһөн олорбуттара номнуо 50 уонна 55 сыл буолбут Константин Михайлович, Матрена Степановна Федоровтар, Анатолий Уварович, Зинаида Ивановна Ивановтар,
Кузьма Кузьмич, Софья Николаевна Протодьяконовтар, Валерий Васильевич, Августа Иннокентьевна  Павловтар дьиэ кэргэн төгүрүк сылларын бэлиэтээһин буолла. Куруутун буоларын курдук бу күн Ил Дархан махтал суругун, "Дьиэ кэргэн килбиэнэ" знагы отделбыт салайааччыта М.Д. Кокарева туттарда. Тумус туттар киһибит, улууспут баһылыга Ю.И. Слепцов уонна нэһилиэктэрин баһылыктара эҕэрдэ сурук, сибэкки дьөрбөтө уонна 50 тыһыынча сууммалаах сертификаты бэлэх ууммуттара ыалларбытыгар истиҥ үөрүү буолла. Баһылыкпыт эһиилгэттэн Нам улууһун "Кыһыл көмүс ыала" диэн кинигэ тахсарын туһунан былаанын үллэһиннэ. Ытыктыыр дьоммутугар бииргэ үлэлээбит коллегалара, инники кэскиллэрэ-оҕолоро, сиэннэрэ махтал, эҕэрдэ тылларын анаатылар. Бу күн таптаһар сүрэхтэр, юбилейдаах паралар Анастасия Ядрихинская нарын ырыатыгар уйдаран, вальс үҥкүүлээн мустубут дьон сүрэхтэрин долгуттулар.
Манна даҕатан эттэххэ ааһан эрэр 2023 сылга биһиги улууспутугар 24 ыал юбилейнай дататын бэлиэтээтибит, өссө да бэлиэтиэхпит турдаҕа.

Саргылана Азарова