Аан дойдутааҕы Дьиэ кэргэн күнүгэр түбэһиннэрэн Сунтаар улууһун ГТАС отделыгар Владимир Александрович уонна Марианна Яновна Сидоровтар дьиэ кэргэн буолалларын сокуонунан бигэргэтэр үөрүүлээх түгэннэрэ буолла.

Сидоровтар дьиэ кэргэн Сунтаар нэһилиэгин олохтоохторо, бэйэлэрэ 4 улахан оҕолоохтор, кыралара 7-с кылаас үөрэнээччитэ. Владимир уонна Марианна сүрдээх күүстээх санаалаах, саха омук аһыныгас үгэһин салҕыыр амарах санаалаах ыал буолаллар. Ол курдук 2022 сыллаахха Тойбохой оҕо дьиэтиттэн икки саастаах кырачаан кыысчааны ылан ииппиттэрэ, онтон быйыл өссө үс бииргэ төрөөбүт оҕолору ылан «Оҕону иитэр дьиэ кэргэн» статуһун ыллылар (бу туһунан сиһилии улуустааҕы «Сунтаар сонуннара» хаһыакка биэрбит олус интэриэһинэй интервьюларыттан ааҕыахха сөп).

Маннык үтүө санаалаах ыалбытын Сунтаар нэһилиэгин аҕа баһылыга Эдуард Филиппов эҕэрдэлээтэ, Сунтаар нэһилиэгин туһунан өйдөбүнньүк кинигэ туттарда уонна дьиэ кэргэн политикатын сайыннарар дьиэ кэргэнинэн киэн туттарын биллэрдэ.

Сунтаар улууһун ГТАС отделын салайааччыта Анна Григорьева