Дьиэ кэргэн күнүн, бүтүн Россиятааҕы юридическай көмө нэдиэлэтин чэрчитинэн, от ыйын 10 күнүгэр Л.А.Попов аатынан Сунтаардааҕы киин бибилэтиэкэҕэ нэһилиэнньэҕэ анаан олус сэргэх аһаҕас аан күнэ тэрилиннэ. Бу күн сэлиэнньэ олохтоохторун ыйытыыларыгар нэһилиэнньэ көмүскэллээх буолуутун управлениета (УСЗН), улуус юридическай салаата, Сунтаар оройуонун прокуратурата, Сунтаар улууһун баайга-дуолга сыһыаннаһыыларга комитета (КИО), гражданскай турук аакталарын суруйуу (ЗАГС), элбэх өҥөнү оҥоруу киин (Госуслуги), уонна «Социальнай хантраагынан бэйэ дьыаланы арыныыга көмө» эппиэттээх үлэһиттэр хоруйдаатылар, мунаарар боппуруостарыгар сүбэ-ама биэрдилэр. Сунтаар, Аллыҥа, ыраах сытар Түбэй, Шея нэһилиэктэриттэн киирэн барыта отуттан тахса киһи кыттыыны ылла.

Сунтаар улууһун ГТАС отделын специалиһа Андреева Н.И. кэлбит дьон араас боппуруостарыгар быһаарыы биэрдэ, Госуслуга нөҥүө бэриллэр сайабылыанньалары толоруу туһунан кэпсээтэ, бэйэтэ оҥорбут буклеттарын сиһилии быһаарда, хас биирдии киһиэхэ биэрдэ.

Кыттыыны ылбыт дьон сэргээн, өссө да маннык аһаҕас аан күнэ элбэхтик тэриллэригэр баҕа санааларын эттилэр, махтаннылар.

Сунтаардааҕы ГТАС отделын специалиһа Надежда Андреева