Бу дьыл сэтинньи ыйын 16 кунугэр Сунтаар нэһилиэгэр Аллыҥа нэһилиэгин ытык-мааны ыаллара Альбина Петровна, Парфений Трофимович Алексеевтар үйэ аҥара иллээхтик-эйэлээхтик бииргэ олорбуттарын бэлиэтиир дьоро күннэрэ тэрилиннэ. Сунтаардааҕы ГТАС отделын салайааччыта Анна Григорьева мустубут ыалдьыттар иннилэригэр кыһыл көмүс сыбаайбалаахтары эҕэрдэлээтэ. Үбүлүөйдээх дьоммут улуус кыһыл көмүс бочуоттаах кинигэтигэр илии баттаатылар, кыһыл көмүс биһилэхтэри хардарыта кэттилэр, аал уоту оттон унаарыттылар.

Улуус дьаһалтатын социальнай отделын салайааччыта Тамара Иванова үйэлээх тапталынан кынаттаммыт дьоһун-мааны ыалга СӨ Ил Дархана А.Николаев олохтообут «Дьиэ кэргэн килбиэнэ» бэлиэни үөрүүлээх быһыыга-майгыга туттарда.

50 сыл анараа өттүгэр сэтинньи 1 күнүгэр эдэркээн Альбина уонна Парфений сүрэхтэрин холбообуттара, Алексеевтар диэн дьиэ-кэргэн буолбуттара. Олох устун үйэ аҥара бииргэ буолар, өйөһөн-өйдөһөн олорор дьылҕа хаан ыал ахсын биэрбэт күндү бэлэҕэр тиксэн Алексеевтар нэһилиэк тумус туттар сис ыала буолан элбэх оҕону төрөтөн, иитэн-такайан, үлэһит дьон оҥортоон, билигин да ынах-сүөһү тутан, бааһынай хаһаайыстыба тэринэн быр-бааччы олороллор.

Өр сылларга үлэни тумус туттан төрөөбүт-үөскээбит нэһилиэктэригэр тыа хаһаайыстыбата сайдарын туһугар үлэлээн-хамнаан кэлбит дьоһун-мааны ыалбытыгар өссө да өр сылларга иллээх-эйэлээх сыһыаҥҥытынан, нарын-намчы тапталгыт сылааһа уҕараабакка, сылтан сыл оҕолоргут, сиэннэргит өйөбүллэринэн бар дьоҥҥутугар үтүө холобур буола тураргытыгар баҕарабыт.

А.Никифорова, Аллыҥа нэһилиэгин дьаһалтатын ГТАС специалиһа