50 сыл анараа өттүгэр ырыаҕа ыламмыт, хоһооҥҥо холбоммут Амма эбэ хотун биир кэрэ кытылыгар турар кырдьаҕас Чычымах алааһыгар Амма нэһилиэгин сэбиэтигэр эдэркээн дьон Мария Скороходкина уонна Малышев Василий, 1975 сыл олунньу ый 20 күнүгэр ыал буолар туоһу сурук туппуттара. Онтон ыла үйэ аҥарын устата күүстээх тапталларын уота уостубакка кэскил тэнитэн, үлэни өрө тутан сахалыы сиэринэн сэмэйдик иллээх дьиэ кэргэн буолан 50 сыл бииргэ олорон кэллилэр.

Быйыл 2025 сыл Дойдубут үрдүнэн Аҕа Дойдуну көмүскээччилэр, Өрөспүүбүлүкэбитигэр Ийэ Дойдуну көмүскээччи, Тааттабыт улууһугар Кыайыы сыла биллэриллибиттэрэ. Бу бэлиэ сылга кулун тутар 1 күнүгэр Мария Николаевна уонна Василий Андрианович Малышевтар 50 сыл бииргэ олорбуттарынан Саха Өрөспүүбүлүкэтин Ил Дарханын укааһынан олохтоммут, «Дьиэ кэргэн килбиэнэ» урдуку бэлиэни туттулар. Маны тэнэ Таатта улууһун кэргэнниилэрин Бочуотун кинигэтигэр уонна «Амма нэьилиэгэ» олохтоох дьаһалта 2019 сыллаахтан төрүттээбит үбүлүөйдээх ыаллар кинигэлэригэр киирдилэр, үөрэн-көтөн туран илии баттаатылар.

Улахан ыал күн күбэй ийэтэ Мария Николаевна Амма нэһилиэгин бочуоттаах олохтооҕо, 35 сыл ыстаастаах бэтэрээн учуутал, Саха Өрөспүүбүлүкэтин үөрэҕириитин туйгуна, Учууталлар учууталлара, В. И. Ленин 100 үбүлүөйдээх сааһынан килбиэннээх үлэтин иһин мэтээллээх нуучча тылын учуутала.

Ыал аҕа баһылыга Василий Андрианович үйэтин тухары тыа хаһаайыстыбатыгар суоппарынан таһаарыылаахтык үлэлээбитэ. Таатта улууһугар автомобильнай сулууспаҕа тус кылаатын иһин муниципальнай бэлиэ хаһаайына. Бастыҥ үлэтин иһин "Коммунизм" сопхуос үбүлүөйнэй мэтээлинэн наҕараадаламмыта.

Ытык мааны дьоммут Мария Николаевна уонна Василий Андрианович 50 сыл бииргэ тутуһан, туруулаһан, оҕо-уруу тэнитэн биир санаанан өйдөһөн-өйөнсөн биир ыллыгынан хааман дьоһун олоҕу олорон кэллилэр. Инникитин да оҕолоргут, сиэннэргит, хос сиэннэргит уонна чугас дьоҥҥут истиҥ сылаас сыһыаннарыгар уйдаран уһун үйэлэниҥ, оҕолоргут дьоллоро дьолгутугар дьол эбэн үөрүүгүт үксээтин.

Таатта улууһун «Амма нэһилиэгэ» тыа сирин түөлбэтин дьаһалтатын специалиһа Лена Михайлова⁣