Наммыт улууһугар өр сылларга, куруук бииргэ, эйэ дэмнээхтик, өйдөһөн-өйөһөн, күүстээх тапталынан кынаттанан олорбут ытык-мааны ыаллары чиэстиир үөрүүлээх тэрээһин буолла.

Ленскэй нэһилиэктэн Ирина Ксенофонтовна Бугаева, Алексей Прокопьевич Чесноков эйэ-дэмнээхтик бииргэ олорбуттара 50 сыла, Модут нэһилиэгиттэн Елизавета Петровна, Дмитрий Георгиевич Ядрихинскайдар бииргэ олорбуттара 50 сыллара, Хамаҕатта нэһилиэгиттэн Татьяна Даниловна, Прокопий Николаевич Канаевтар уйгулаах суолунан бииргэ олорбуттара 50 сыллара, Хамаҕатта нэһилиэгиттэн Саргылана Николаевна, Герасим Герасимович Дорофеевтар сүрэхтэрин сылааһын холбоон бииргэ олорбуттара 55 сыллара, Модут нэһилиэгиттэн Дария Ивановна Ядрихинская, Ион Ионович Васильев дьоһун олоҕу бииргэ олорбуттара 55 сыллара, Хомустаах бастакы нэһилиэгиттэн Акулина Ильинична, Семен Семенович Колесовтар тапталга бигэнэн бииргэ олорбуттара 60 сыла.

Күндү ыалларбыт 50, 55, 60 сыл анараа өттүгэр курдук, долгуйан туран, өссө да өр, дьоллоохтук олоруохпут диэн бигэргэтэн илии баттаатылар.

Улуус баһылыга Юрий Иннокентьевич эҕэрдэлээн туран Саха Өрөспүүбүлүкэтин Ил Дархана анаабыт "Дьиэ кэргэн килбиэнэ" знагы уонна нэһилиэк, улуус дьаһалтата сылын аайы биэрэр 50, 55, 60 тыһ. сууммалаах сертификаты туттарда. Бу күн үбүлүөйдээх ыалларбытын нэһилиэктэрин баһылыктара, дьиэ кэргэн отделын салайааччыта, оҕолоро-уруулара, аймахтара эҕэрдэлээтилэр, сибэкки дьөрбөтүн, эҕэрдэ суруктары бэлэх ууннулар.

Түмүккэ 90 саастаах Семен Семенович кэргэнинээн Акулина Ильиничнаны кытта харда тыл этэн, хомус тардан дьиэрэһиппитэ барыбытын долгутта.

Күндү үбүлүөйдээх дьиэ кэргэттэрбит өссө да уһуннук олорун, бу курдук чэгиэн чэбдик сылдьын.

Нам улууһун ЗАГС отделын салайааччыта С.Азарова